„Google“ објави дека ќе го прекине одржувањето на софтверот „Adobe Flash“ за сите свои платформи за интернет реклама. Наместо него ќе се користи технологијата на „HTML5“.
Уште од 30-ти јуни годинава нема да може да се видат „Flash“ рекламите во „AdWords“ и „DoubleClick Digital Marketing“ на „Google“. Вчитаните долгорочни кампањи до овој датум ќе можат да се појавуваат уште неколку месеци потоа. Почнувајќи од 2-ри јануари 2017-та година „Google“ ќе го прекине целосно одржувањето на „Flash“ и такви реклами воопшто нема да можат да бидат прикажани.
Ова е голем чекор кон постепено поместување на „Flash“ од интернетот и неговата замена со „HTML5“. За сега „Google“ ќе ги остави видео рекламите кои се направени преку „Flash“, но препорачува сите други „Flash“ базирани реклами да бидат сменети што е можно поскоро.
Компанијата „Adobe“, која е творец на „Flash“, веќе е подготвена со неговиот наследник – „Animate CC“. Тој е направен по новите стандарди и од „Adobe“ се надеваат дека ќе се здобијат со истата популарност како „Flash“ во најдобрите години. Самиот „Flash“ беше многу распространета платформа, но со годините беа откривани мноштво сериозни пропусти во нејзината безбедност. Покрај тоа продуктивноста и ефикасноста на софтверот беше далеку од оптимална, што дополнително ги зголеми критиките кон неа. Постепено индустријата почна да го отстранува одржувањето на „Flash“, но ќе поминат барем уште неколку години пред софтверот да исчезне целосно од интернет.
