„Ferrari“ продолжува успешно да балансира по тенката линија која ја разделува екслузивноста од масовното производство, со раст на продажбата од 6 отсто во 2015-та година.
Во годината која е зад нас италијанскиот производител на суперспортски автомобили продал 7.664 возила, што е нов рекорд во историјата на компанијата. За растот на продажбата се најзаслужни автомобилите со „V8“ мотори, кои се вградени во новите модели во гамата на „Ferrari“ – „California T“, „458 Speciale A“ и „488 GTB“.
Од друга страна, „F12 Berlinetta“ и „Ferrari FF“, кои се на пазарот 4 односно пет години, забележаа пад во побарувачката од 24%.
Вкупен раст на продажбата е забележан во повеќе региони, а пред се во Јапонија, Австралија, Сингапур, Индонезија и Јужна Кореа.
Веста за добрите продажни резултати и растот на испораката доаѓа во момент кога од „Ferrari“ пристигнуваат најави дека горната граница за годишно производство би можела да биде подигната на 9.000 возила, што е значително повеќе од политиката за „7.000 автомобили годишно“ која ја застапуваше поранешниот прв човек на компанијата, Лука ди Монтеѕемоло.
