Околу 10 милиони примероци од моделот „G3“ се загрозени од хакерски напади поради пропуст во апликацијата „Smart Notice“ кој компанијата го отстранила со новата надградба. Таа веќе се шири до засегнатите уреди пријави онлајн изданието „Ars technica“.
„Smart Notice“ е своевиден дигитален асистент, кој дава совети на потрошувачите, ги потсетува за различни настани, автоматски ги зачувува нови контакти и друго. Излегува дека верзијата на апликацијата за „G3“ има проблеми со валидација на информациите. Ова им овозможува на хакерите да извлекуваат податоците, како и да манипулираат со информациите и да пуштаат програмски команди.
Проблемот бил откриен од страна на компанијата за сајбер безбедноста „Cynet“ која ја известила „LG“. Инженерите на „Cynet“ споделија дека корејската компанија реагирала брзо и го поправила проблемот. Тој е отстранет во новата верзија на апликацијата „Smart Notice“ која постепено станува достапна за потрошувачите. Околу 10 милиони примероци на „G3“ се засегнати, што не е малку и затоа специјалистите им препорачуваат на корисниците да ја инсталираат новата верзија на „Smart Notice“, веднаш кога ќе стане достапна за нив.
