Продажбата на „Lamborghini“ продолжи да расте, па во 2015-та година достигнуваат нов врв, соопштуваат од компанијата. Реализираните примероци на светските пазари за прв пат во историјата на производителот ја надминуваат границата од 3000.
Точниот број е 3245, што е значително подобрување во однос на 2014-та година, кога компанијата продаде 2530 автомобили.
Од „Lamborghini“ не прецизираат за продажбата на одделни модели, но пак велат дека очекуваат растот да продолжи и во текот на оваа година. Ангажиран е дури дополнителен персонал за да го обезбеди очекуваното зголемување на производството.
Во 2014-та година „Lamborghini“ ангажираше 150 нови работници на производните линии, а во следните неколку години работната снага ќе биде зголемена за уште 500. Моменталниот персонал во фабриката на компанијата е 1.300 лица.
За зголемувањето на продажбата главна улога треба да одигра моделот „Urus“, кој очекуваме за околу 2 години. Тој претставува кросовер и е претставник на најбрзо растечкиот сегмент на пазарот. Според извршниот директор на „Lamborghini“ Стефан Винкелман по премиерата на „Urus“ продажбата на брендот ќе достигне 5000-6000 примероци годишно.
Но не само „масовните“ модели на „Lamborghini“ се продаваат добро. Неодамна компанијата откри дека ќе покаже посебен модел, посветен на 100-годишнината од раѓањето на Феручо Ламборгини. Предметната машина се уште не е претставена официјално, не се знае дури и името. Сепак сите 40 примероци (20 купе и 20 кабриолет) се веќе претплатени од клиенти. Се шпекулира дека цената на овој модел ќе биде околу 2,4 милиони долари. Премиерата ќе се одржи во Женева во март.
