По две децении, колку што мина од лансирањето на првиот „Boxster“, производителот од Штутгарт сметаше дека е време за радикални промени. Актуелната трета генерација претрпе редизајн, но и бројни механички подобрувања.
Редизајнот пред се опфаќа елементи на надворешноста, како предните и задните светлосни групи, со цел автомобилот да изгледа посовремено и да биде поконкурентен на пазарот. Во кабината промените се забележливи на воланот, а на купувачите на располагање им се најновиот мултимедијален систем со нов екран.
Иако станува збор за редизајниран модел, „Boxster“ зa 2016-та е многу повеќе од тоа. Покрај очигледните разлики во името, ознаката „718“ претставува посвета на моделот „Porsche 718“ од 1957-ма година, а најважните промени се случија под хаубата.
Досегашните шестцилиндарски 2.7 и 3.4 литарски атмосферски агрегати го остапија местото на турбо бензинците со 4 цилиндри.
„718“ може да се пофали со модерен и компактен 2.0-литарски турбо-бензински „боксер“, кој благодарение на „VTG“ технологијата (турбина со променлива геометрија), ослободува 300 КС и 380 Nm.
„Porsche“ веднаш во понудата смести и помоќна верзија, „718 Boxster S“, којашто ја придвижува 2.5-литарски турбо „боксер“, од којшто се извлекуваат максимални 350 КС, додека максималниот вртежен момент изнесува 420 Nm.
Според објавените податоци, „718 Boxster“ од состојба на мирување до 100 km/h стига за 4.7 секунди, а помоќната „S“ верзија, којашто е опремена со опционален „PDK“ менувач и „Sport Chrono“ пакет, тоа го прави за само 4.2 секунди!
Почетокот на продажбата на новиот модел се очекува кон крајот на месец април оваа година и тоа по цена од 53.646 евра за „718 Boxster“, односно 66.141 евро за помоќниот „718 Boxster S“.
