„Foxconn“, тајванската компанија која составува поголемиот дел од телефоните на „Apple“, предложила 625 милијарди јени (5,3 милијарди долари), за купување на јапонскиот производител на електроника „Sharp“.
„Sharp“, која постојано е спасувана од страна на банките, е подготвена да ја разгледа конкурентската понуда на „Innovation Network Corp of Japan“ (INCJ), државно поддржан инвестиционен фонд. Извор запознаен со случајот, тврди дека Фондот понудил околу 300 милијарди јени – сума, за која претходно напиша весник „Nikkei“. Не е јасно дали понудата на „INCJ“ ќе бара отстапки од главните кредитори на „Sharp“.
Претставници на јапонските власти изразија загриженост во врска со дозволувањето на „Sharp“ под контрола на странски фирми, повикувајќи се на нејзината технологија во сферата на дисплеите. „Innovation Network Corp of Japan“ веќе го поседува контролниот пакет акции во „Japan Display“, друг голем производител на дисплеи.
„Јапонските технологија се водечки за оние во другите делови на светот и ние би сакале да ги направиме уште поконкурентни“, коментира министерот за индустрија Мото Хајаши.
„Foxconn“, чие официјално име е „Hon Hai Precision Industry“, нуди повеќе пари за „Sharp“ и желба да ги преземе сите нејзини долгови, посочуваат извори запознаени со понудата. Овие услови имаат за цел да ги убедат доверителите на „Sharp“ да донесат одлука врз основа на економските аспекти на трансакцијата, а не од политички причини, додал изворот.
„Sharp“ се соочува со краен рок за отплата на кредити во износ од 510 милијарди јени во март, според „Standard & Poor’s“. Компанијата изјави дека главните нејзини кредитори се банкарските сектори на „Mitsubishi UFJ Financial Group“ и „Mizuho Financial Group“. „Sharp“ должи вкупно на двете меѓу 500 и 600 милијарди јени, посочуваат извори запознаени со ова прашање.
Од своја страна „Foxconn“ не планира да го смени топ менаџментот на „Sharp“, коментираат други извори. Овој чекор има за цел да ги смири јапонските вработени кои се загрижени од евентуалното странско купување. Надежите се дека „Sharp“ и нејзините кредитори ќе донесат одлука до 4-ти февруари, кога „Sharp“ треба да ги објави своите финансиски резултати за последниот квартал.
Претставници на „Foxconn“, „Sharp“ и „INCJ“ одбиваат да го коментираат ова прашање.
