Германската авиокомпанија „Lufthansa“ во 2015 година превезе рекорден број на патници, и покрај штрајковите на нејзините пилоти и кабинскиот персонал поради спор со управата за платите и програмата за предвремено пензионирање.
Авиокомпаниите од групацијата „Lufthansa“ минатата година превезле 107,7 милиони патници, што е нов рекорд, се наведува во соопштението на германската компанија, пренесува агенцијата Франс прес.
Овие податоци се за 1,6 проценти повисоки во однос на податоците од 2014 година, наведува француската агенција, и потсетува дека во сопственост на „Lufthansa“ се авиокомпаниите „Austrian Airlines“ и „Swiss International Air Lines“, како и нискобуџетната „Germanwings“.
Од „Lufthansa“ соопштија дека минатата година се реализирани повеќе од милион летови, за 0,2 проценти повеќе во однос на 2014 година и дека е достигната највисоката стапка за пополнетост на капацитетите од 80,4 проценти.
Групацијата „Lufthansa“ значително инвестира и во унапредувањето на сопствените понуди и услуги во изминатите неколку години, се наведува во соопштението на компанијата.
