Две рејтинг агенции веќе го потврдија мислењето дека Германија го заслужува својот рејтинг „ААА“. „Fitch Ratings“ го даде максималниот рејтинг на најголемата економија во Европа со „стабилна“ перспектива. Слично е мислењето и на „Standard & Poors“.
„Fitch“ посочи дека Германија има соодветни финансиски ресурси за да се справи со бегалскиот прилив, и предвидува економски раст за 2016-та година од 1,9 отсто.
Агенцијата исто така предвиде дека сојузниот буџет на Германија за оваа година ќе биде избалансиран, откако во 2015-та година забележа суфицит.
„Standard & Poors“ од своја страна ја одредува Германија како модерна и конкурентна економија, затоа што федералната влада спроведува претпазлива фискална политика.
Во петокот инвестициската банка „Goldman Sachs“ предупреди дека економијата на Европа е загрозена токму од бегалскиот бран и од политичката нестабилност. Германија исто така беше наведена како една од земјите за кои постои опасност за политичката стабилност, а причината за тоа се повеќе од 1 милион бегалци кои пристигнаа во земјата во 2015-та година.
Германската канцеларка Ангела Меркел е остро критикувана за политиката кон мигрантите, како од опозицијата, така и во редовите на сопствената партија.
Синоќа на партиската седница во Мајнц, Меркел призна дека бројот на бегалци кои пристигнуваат во Германија е намален, но продолжува да е премногу голем.
„Сега пристигнуваат значително помалку отколку пред тоа, но и понатаму се премногу“, посочи таа, цитирана од агенциите.