По речиси четири години развој очилата за виртуелната реалност „Oculus Rift“ започнаа да се продаваат за обичните корисници. Компанијата „Oculus VR“ веќе прифаќа пред-нарачки за уредот кој ќе чини 700 евра во Европа.
Цените на комплетот варираат според регионот. Најевтин ќе е во САД – 599 долари. Испораките почнуваат пред април годинава, иако некои корисници беа известени дека ќе мора да почекаат дури до мај и потоа. Не е јасно дали причината е ограничена достапност или нарачките кои ги надминаа очекувањата на компанијата.
„Oculus VR“ беше купена од „Facebook“ во 2014-та година за околу 2 милијарди долари. Во профилот на социјалната мрежа Марк Цукерберг најави дека првично за очилата ќе има околу 100 игри и апликации кои ќе се искористат до максимум од виртуелната реалност. Сите тие треба да бидат достапни до крајот на оваа година.
Во комплетот е вклучен сето потребно – очила, далечински управувач, контролер за „Xbox One“, камера за следење на движењето на главата со статив, две игри, сите потребни кабли и куфер за складирање.
За да може да се искористат можностите на „Oculus Rift“, корисникот ќе мора да има и релативно моќен компјутер. Компанијата препорачува минимум процесор „Intel Core i5“, 8GB RAM меморија и графичка од рангот на „Nvidia GeForce GTX 970“ или помоќна.
„Oculus Rift“ ќе се продаваат во 20 земји кои ги имаат потребните сертификати и дозволи. Бројот на земјите ќе се зголемува постепено. Од компанијата додаваат дека сега прифаќаат само нарачки, но не земаат пари од корисниците. Ова ќе се случи дури кога ќе почне снабдувањето и откако ќе се појават коментарите на уредот.
„Имаме доверба во нашиот производ“, коментира на „Twitter“ Палмер Лаки, кој е основач на „Oculus VR“.