„Intel“ потпиша конечен договор за стекнување на компанијата за дронови со седиште во Германија, „Ascending Technologies“. Потегот е дел од напорите на производителот на чипови да го стимулира развојот на нови производи и користењето на неговите производи, пишува „Bloomberg“.
„Ascending Technologies“ создава дронови и технологии за нив, кои може да бидат искористени од страна на истражувачите, како и за комерцијални потфати. Зделката се случува по инвестицијата на „Intel“ од 60 милиони долари во минатиот август. Тогаш таа ја купи шангајската компанија за беспилотни авиони и вселенски технологии „Yuneec International“.
Производителот на чипови и нејзиниот конкурент „Qualcomm“ инвестираат во компании за дронови, бидејќи успехот на беспилотни авиони може да помогне за проширување на пазарот на чипови. Пред извесно време „Intel“ инвестираше и во компаниите за дронови „Airware“ и „PrecisionHawk“.
„Ascending Technologies“ користи технологија на „Intel“, наречена „RealSense“ поврзана со сензорите на нејзините летачки производи. По стекнувањето, компанијата ќе работи со други тимови од „Intel“, а целта е нејзините дронови да почнат да собираат повеќе информации за нивната околина, тврди Џош Волден, генерален менаџер на „New Technology Group“ на „Intel“.
Засега финансиските параметри на договорот не се објавени.
Главниот извршен директор на „Intel“, Брајан Крзанич ги покажа дроновите кои се дело на „Ascending Technologies“ за време на минатогодишната изложба „International Consumer Electronics Show“ во Лас Вегас. Кразнич ќе се вклучи и во овогодинешното издание на „CES“, кое стартува денеска.
