Јужнокорејската компанија „LG Display“ и делот за панели на „Samsung Electronics“ ќе испорачуваат „OLED“ екрани за новите смартфони „iPhone“ на „Apple“, пишува „Electronic Times“, повикувајќи се на анонимни извори.
Гласините се појавија по години шпекулации дека „Apple“ ќе започне да ја користи технологијата од новата генерација во своите мобилни уреди, пишува „Ројтерс“.
„OLED“ екраните се потенки и нудат подобар квалитет на сликата од „LCD“ дисплеите.
Во минатиот месец јапонскиот весник „Nikkei“ напиша дека „Apple“ планира да користи „OLED“ екрани за „iPhone“ од 2018-та година.
„LG“ и „Samsung Display“ се блиску до финалниот договор со „Apple“ за екраните, посочува уште „Electronic Times“, додавајќи дека двете корејски компании планираат да потрошат вкупно 15 илјади милијарди вона (12,8 милијарди долари) капитални трошоци за изградба на производствен капацитет за „OLED“ продукција во наредните две до три години.
„Apple“ веројатно исто така ќе помогне со финансирањето и ќе ја поддржи инвестицијата, посочува весникот.
„LG Display“ и „Samsung Display“ одбиваат да коментираат на оваа тема, а од „Apple“ исто така не се достапни за коментар.
„Samsung Display“, која во моментов прави „OLED“ екрани за паметни телефони на својата матична компанија „Samsung Electronics“ и за кинеските компании, најверојатно, ќе добие поголеми количини од нарачките за разлика од „LG Display“, додава весникот.
