Корисниците на смартфони со оперативниот систем „Windows Phone 8.1“ ќе мора да почекаат уште неколку месеци за „Windows 10 Mobile“. „Microsoft“ објави дека го одложува лансирањето на мобилната верзија на новата платформа за следната година.
Првичните планови на „Microsoft“ беа оперативниот систем да е подготвен овој месец и да се испрати до мобилните телефони. За сега компанијата не дава детали што е причината за одложувањето. Таа најави само дека „Windows Phone 8.1“ ќе биде надграден во почетокот на следната година, и тоа само за одредени смартфони. Кои ќе бидат тие паметни телефони се уште не е познато.
Значи за сега единствените паметни телефони со „Windows 10 Mobile“ остануваат новите „Lumia 950“ и „950 XL“. Платформата достигна „RTM“ статус (подготвена за производство) во ноември годинава. Токму со оваа верзија се нудат двата смартфони.
Во овој месец „Microsoft“ ја објави и првата надградба за софтверот, но поради проблеми со инсталацијата, привремено беше отстранетa од нивните сервери и сега повторно постепено почнува да се шири.
