„Mercedes-Benz“ официјално ја откри внатрешноста на новата генерација „E-Class“, чија светска премиера е закажана за месец јануари 2016-та година.
Од првите официјални фотографии станува јасно дека Ентериерот на „E-Class“ е во голема мера позајмен од поголемиот и поскап модел „S-Class“. Користена е истата шема со два големи екрани. Едниот ги заменува апаратите на таблата со инструменти, а другиот, кој се наоѓа на централната конзола е одговорен за инфо-забавниот систем на возилото.
Слично кај „E-Class“ и „S-Class“ е поставеноста на отворите за вентилација, како и на копчињата за управување на седиштата. Главните разлики се во долниот дел на конзолата, која кај новиот седан демонстрира различен распоред на копчињата.
Според претставените фотографии моделот располага со инструмент табла тапацирана со кожа и елементи од природно дрво. Кај различните верзии на опрема ќе се нудат различни волани, дисплеи и тапацир, а дел од нив можат да се видат на фотографиите.
Во моментов недостасуваат подетални информации за „Mercedes-Benz E-Class“, но се очекува моделот да го добие системот „NFC“, преку која сопственикот ќе може да го користи својот смартфон како клуч за пристап до возилото. Слично на новата „BMW 7-Series“, мобилен уред ќе може да се користи и како далечински управувач за паркирање на возилото.
Сите детали за седанот ќе бидат откриени за време на автомобилскиот саем во Детроит во јануари. Стартот на продажбата е закажан за април 2016-та година, кога се очекува да ја видиме и караван верзијата.
