Динамо Загреб, Валенсија и Шахтјор очекувано изборија пласман во фазата по групи во Лигата на шампионите, додека изнандувачки меѓу елитата оваа сезона ќе играат Макаби Тел Авив и Малме.
Валенсија го елиминараше во плејофот минатосезонскиот четвртфиналист Монако, иако во Франција загуби со 2:1. Шпанскиот тим на првиот меч славеше со 3:1 и со вкупни 4:3 се пласира во главната рунда.
Шпанија, по пласманот на Валенсија во фазата по групи стана првата земја која во Лигата на шампиони има пет тимови, откако претходно своето место меѓу елитата го обезбедија Барселона, Реал, Атлетико Мадрид и Севиља како победник во Лига Европа.
Пласманот на Валенсија го најави Алваро Негредо кој постигна велемајсторски гол во четвртата минута. Шпанскиот репрезентативец со брилијантен лоб удар го совлада Субашиќ. До крајот на полувремето израмни Раџи, а конечниот резултат го постави Елдерсон во 75-та минута.
Динамо и во вториот меч славеше над Скендербег и со вкупни 6:2 го мина плејофот. Два гола постигна Алжирецот Судани, а по еден Хоџиќ и Таравел, додека единствениот гол за албанскиот шампион е дело на Ескердиња.
Шахтјор имаше многу проблеми со Рапид Виена, а клучна за пласманот на украинскиот шампион беше минималната победа во првиот меч (1:0). Во реваншот Шахтјор поведе преку Марлос, а потоа Рапид направи пресврт преку Шауб и Хофман, а конечниот резултат го постави Гладкиј. Рапид во финишот промаши две големи шанси за победа.
Макаби и Базел одиграа 1:1, но израелскиот тим ќе игра во главната фаза бидејќи постигна повеќе голови на гостински терен, првиот меч во Базел заврши со резултат 2:2. Вистински херој на Макаби е Зехави кој ги постигна сите три гола во двомечот со Базел.
Малме втора година по ред ќе игра во фазата по групи, откако успеа да го елиминира Селтик. По поразот во првиот меч од 3:2, Малме на домашен терен славеше со 2:0 со головите на Розенберг и Бојата (авто гол).
