Преносот на хартии од вредност врз основа на договор за подарок меѓу брачните партнери или помеѓу родители и деца наскоро нема да подлежи на обврската за давање понуда за преземање.
Тоа се предвидува со Предлог законот за дополнување на Законот за преземање на акционерските друштва, чие прво читање денеска помина на седницата на собраниската Комисија за финансирање и буџет. Комисијата едногласно заклучи дека е прифатлив Предлог законот и оти може да се даде на натамошно читање.
Заменик министерот за финансии Ардијан Џељадини појасни дека согласно Законот обврската за давање понуда за преземање на контролата на целото акционерско друштво може да биде доброволна или задолжителна за сите сопственици на хартии од вредност.
Задолжително треба да даде понуда лицето кое заедно со лицата со кои соработува постигнало доволен праг за преземање на контрола.
„Овој праг е до 20 отсто од хартии од вредност со право на глас издадени од одредено акционерско друштво без претходна понуда. Со дополнувањето на Законот се предвидува да се утврди дополнителен исклучок од обврската за давање понуда за преземање при пренос на хартии од вредност и тоа врз основа на договори за подарок помеѓу брачни другари или помеѓу родители и деца, односно на лицата од прв наследен ред“, рече Џељадини.
Членот на Комисијата Ѓорѓи Коџобашиев од ВМРО-ДПМНЕ посочи дека и до сега исклучок од обврската за давање понуда за преземање имаше лицето кое го постигнало контролниот праг за преземање ако го достигнало со стекнување хартии од вредност заради замена на хартии од вредност на правно лице во случај на спојување или поделба престанало да постои.
„Покрај тоа обврската не важи и во стечајна постапка кога лицето се јавува како стечаен доверител, при промена на правниот облик на трговското друштво, при присоединување со трговски друштва под услов само едно од друштвата кои учествуваат во постапката да поседува акции од акционерското друштво, при зголемување на основната главнина со емисија за познат купувач откако Собранието на акционери одобрило дека лицето може да стекне хартии од вредност во износ поголем од условот за давање понуда за преземање“, рече Коџобашиев.
Обврската, додаде, не важи и кога преземањето е по основ на непарничен влог при основање или зголемување на основната главнина на друштвото и доколку станува збор за друштво во рамки на истата група, како и ако преземањето е врз основа на извршена судска одлука, врз основа на наследство или преку поделба на имотот стекнат во брак или вонбрачна заедница.
