Рускиот претседател Владимир Путин во пресрет на денешната посета на Куба потпиша договор со кој се откажува од враќањето на 90 проценти од огромниот долг на Хавана кон поранешниот Советски Сојуз.
На овој начин Москва на Хавана ќе и отпише повеќе од 31 милијарда долари долг. Путин денес пристигна во Куба во рамките на шестдневната посета на Латинска Америка.
Долниот дом на рускиот парламент го ратификуваше на 4 јули договорот на Русија и Куба со кој се предвидува отпис на долгот, кој е потпишан во 2013 година за време на посетата на премиерот на Русија, Дмитриј Медведев на Хавана.
Вкупниот долг на Хавана кон Москва изнесува 35,2 милијарди долари, што значи дека ќе бидат отпишани 31,7 милијарди долари долг, а репрограмирано е и враќањето на остатокот од околу 3,5 милијарди долари на период од десет години.
Огромниот долг на Хавана кон поранешниот Советски Сојуз ги оптеретуваше односите на Хавана со Москва и ја спречуваше нормализацијата на економските односи помеѓу овие две земји.