Светското првенство во Бразил ги подобрува рекордите во трката за гледаност на турнирот во светот, соопшти ФИФА по првиот круг на дуелите во групната фаза.
Натпреварот помеѓу Јапонија и Брегот на Слоновата Коска минатата недела во 3 часот наутро по македонско време беше еден од најгледаните на шампионатот досега. 34.1 милиони гледачи во Јапонија биле пред телевизорите, за да го видат поразот со 1:2 од Африканците на каналот „NHK“.
Натпреварот на отворањето меѓу Бразил и Хрватска е виден од 42.9 милиони луѓе во земјата домаќин на турнирот на каналот „TV Globo“.
Средбата меѓу САД и Гана била гледана од 11.1 милиони гледачи преку „ESPN“ во САД, што е нов рекорд на телевизиската компанија за натпревар од Светско првенство за мажи.
„Овие рекордни вредности покажуваат колку е популарен фудбалот и светското првенство во светот – од Јапонија до Аргентина“, изјави телевизискиот директор на ФИФА, Никлас Ериксон.
„Гледаме многу охрабрувачки раст на интересот во пазарите како САД и Австралија“, додаде тој.
Загубата на Англија од Италија во Манаус привлекла 14,2 милиони гледачи на „ВВС 1“ во Велика Британија и 12,8 гледачи на каналот „RAI 1“ во Италија.
Германскиот канал „ARD“ бил гледан од 26.4 милиони гледачи при победата на Бундестимот со 4:0 над Португалија.