Најдобрата фудбалска репрезентација на Македонија ја совлада Летонија во пријателски натпревар одигран во Скопје.
На средбата одигран вчера на арената „Филип Втори“ во Скопје, пред околу 2.000 гледачи македонските фудбалери ја совладаа Летонија со 2:1.
Во 29-минута по акцијата на Иван Тричковски од десната страна и уфрлањето во противничкиот шеснаесетник, на висинското место се најде Јован Костовски за водство на Македонија од 1:0. Во 65-минута Летонија дојде до израмнување со автоголот на нашиот репрезентативец Даниел Георгиевски.
Сепак во 72-минута по една несмасна интервенција на гостинската одбрана во сопствениот шеснаесетник, беше досуден пенал за Македонија, кој сигурно го реализира Агим Ибраими поставувајќи ги конечните 2:1 за нашата
репрезентација.
Овој натпревар беше и деби за новиот селектор на сениорите Бошко Ѓуровски кој ќе ја предводи Македонија во претстојниот квалификациски циклус за Европското првенство кој Македонија ќе го започне против актуелниот европски и светски првак Шпанија на гостински терен со дуелот закажан за 8. септември годинава.
