Корисниците на „Apple“ се советуваат да внимаваат на „непоправливи“ безбедносни проблеми со „iPhone“ – еве што знаеме.
Безбедносните истражувачи од „Paradigm Shift“ открија маана кај постарите модели на „iPhone“ и „Apple Watch“ што може да се користи за „џејлбрејк“ на уредите.
Она што го прави овој баг посебен е фактот дека нема решение за него, единствениот начин да се биде навистина безбеден е да се замени уредот со понов модел.
Добрата вест е дека искористувањето на овој баг воопшто не е лесно. Тоа не може да се направи од далечина (преку интернет), бидејќи напаѓачот би морал да има физички пристап до уредот и да го поврзе со компјутер „Raspberry Pi“.
Истражувачите го нарекоа пропустот „usbliter8“ и велат дека влијае на чипот „A12“ во „iPhone XS“, чипот „S4“ во „Apple Watch Series 4“ и „A13 SoC“ (систем на чип) во „iPhone 11“. Се вели дека чипот „S5“ (кој ги напојува „Apple Watch Series 5“, „SE“ од прва генерација и „HomePod mini“) е исто така ранлив.
Ранливоста произлегува од начинот на кој „USB“ контролерите во овие чипови ги обработуваат дојдовните податоци. Тие не ги ресетираат правилно мемориските адреси помеѓу преносите на податоци, дозволувајќи му на напаѓачот да инјектира неовластен код во заштитената меморија на чипот.
Како резултат на тоа, според експертите од „Paradigm Shift“, пропустот може да се искористи за џејлбрејк на уреди, што значи дека напаѓачите би можеле целосно да ги заобиколат безбедносните ограничувања на „iOS“, да инсталираат софтвер на најдлабокото ниво на системот и потенцијално да извлечат податоци складирани на уредот.
Бидејќи ова е пропуст во дизајнот на хардверот (физички компоненти), а не софтверска грешка, „Apple“ не може да го поправи со ажурирање на системот. Единствениот начин да останете целосно безбедни е да надградите на друг модел кој не е засегнат од грешката „usbliter8“. Ова ги вклучува или постарите чипови (пред A12) или „A14“ и поновите чипови.
„Paradigm Shift“ соопшти дека ја известиле „Apple“ за своите наоди и ѝ се заблагодариле на компанијата за нејзиниот „брз одговор, конструктивен пристап и соработка во текот на целиот процес на откривање“.
