Скопје е најевтиниот главен град во Европа кога станува збор за изнајмување стан, покажуваат најновите податоци објавени од „Euronews“, врз основа на анализа на Евростат за 40 европски градови.
Според рангирањето, просечната кирија за стан со две спални соби во Скопје изнесува 470 евра, што го става на последното место меѓу европските престолнини и поголеми градови опфатени во истражувањето.
Сместувањето останува најголемиот трошок за домаќинствата во Европа. Заедно со комуналните услуги, тој учествува со 23,6% од вкупните трошоци на домаќинствата во ЕУ, според Евростат.
Притисокот е особено изразен во големите европски метрополи, каде што кириите значително варираат во зависност од побарувачката и понудата на станови.
Истражувањето опфаќа 40 градови од 38 земји, меѓу кои членки на ЕУ, земји кандидати, ЕФТА држави и Велика Британија.
Огромен јаз меѓу Скопје и најскапите градови
На врвот на листата е Женева, каде што просечната кирија достигнува дури 3.350 евра, додека Лондон е втор со 3.050 евра. Во Даблин и Стокхолм просекот е околу 2.650 евра, а во Осло околу 2.250 евра.
Меѓу најскапите престолнини се и Париз со 2.500 евра, Копенхаген и Луксембург со по 2.350 евра, како и Берн и Хаг со над 2.100 евра.
Во групата средно скапи градови се Берлин (1.750 евра), Мадрид (1.700 евра) и Рим (1.650 евра), додека Загреб, Хелсинки и Атина се движат околу 1.500 до 1.550 евра.
Скопје на дното на листата
По Скопје, кој е на последното место со 470 евра, следуваат Приштина со 520 евра, Анкара со 770 евра и Подгорица со 840 евра. Софија има просек од 900 евра, Никозија 910 евра, а Тирана 920 евра.
Во Букурешт киријата изнесува околу 930 евра, додека Белград, Сараево, Рига и Талин се движат над 1.100 евра.
Причини за големите разлики
Експертите наведуваат дека кириите во Европа значително варираат поради локалниот карактер на пазарот на недвижности.
„На места како Женева, Лондон или Даблин има силна побарувачка од добро платени работници и меѓународни компании, додека понудата на станови не расте доволно брзо“, изјави за „Euronews Business“ експертот за недвижности Мик Калмет.
Според него, зголемената побарувачка по пандемијата, растот на населението, миграциите и поскапувањето на изградбата дополнително влијаат врз цените.
