Топлинските бранови како оној што моментално ги погодува делови од Европа би можеле да имаат сериозно влијание врз европските економии и нивните финансии, со последици како што се послаб раст и пад на даночните приходи, според студија на „Allianz Trade“ објавена денес и цитирана од АФП.
„Екстремните топлотни бранови се структурен економски ризик на кој Европа е особено изложена“, соопшти подружницата за осигурување на кредити на германскиот осигурител „Allianz“.
Економскиот раст на земјите најизложени на топлотни бранови би можел да се намали за 5 до 7 проценти вкупно помеѓу 2026-та и 2030-та година, според проценките на студијата, врз основа на повторување на петте најжешки години помеѓу 2014-та и 2024-та година во тој период.
Овие комбинирани загуби би достигнале 240 милијарди долари во Франција, 147 милијарди долари во Италија, 131 милијарда долари во Германија и 120 милијарди долари во Шпанија.
Студијата забележува дека топлотните бранови се зголемиле седумкратно од 1980-тите, а просечниот број на смртни случаи по епизода се зголемил петкратно. Климатските промени предизвикани од човекот ги интензивираат екстремните временски настани како што се топлотните бранови, сушите и поплавите, според научниот консензус.
„Allianz Trade“ идентификува „критичен праг“ од приближно 30°C, по што загубите на продуктивност брзо се зголемуваат.
Така, „часовното производство се намалува за околу 1,30 долари за секој степен во опсегот од 30-35°C“, што претставува „околу 3 проценти од просечното часовно производство“ за периодот 2014-2024 година.
„Без соодветна стратегија за адаптација, се очекува процентот на изгубени работни часови поради топлотен стрес да се зголеми од 1,4 проценти во 1995 година на 2,2 проценти до 2030 година“, вели анализата
Овој пад на продуктивноста влијае на профитабилноста на компаниите, кои исто така гледаат зголемување на трошоците, додека потрошувачката на енергија се зголемува за околу 1,2 проценти за секој степен Целзиус.
Приходите, потрошувачката на домаќинствата и инвестициите постепено се намалуваат, со можна стагфлација, зголемување на цените и невработеност.
Топлотните бранови не само што доведуваат до пониско економско производство, туку вршат и притисок врз владините буџети, намалувајќи ги даночните приходи до 1,8 проценти годишно во Франција, проценува студијата.
„Трансферите поврзани со инфлацијата, трошоците за здравствена заштита и итните поправки на инфраструктурата ги зголемуваат владините трошоци“, се вели во студијата.
„Allianz Trade“ проценува дека влошувањето на буџетскиот јаз е во просек од околу 0,5 проценти од бруто домашниот производ (БДП) годишно.
Дифицитот на владата на Франција би можел да се зголеми за уште 2,2 проценти од БДП, открива студијата.
