САД и Иран се блиску до потпишување договор што би вклучувал продолжување на прекинот на огнот за 60 дена, повторно отворање на Ормускиот теснец и продолжување на преговорите за ограничување на нуклеарната програма на Иран, објави порталот „Аксиос“, повикувајќи се на американски функционер.
Според извештајот, за време на 60-дневниот период на примирје, Ормускиот теснец би бил отворен без наплата за премин, додека Иран би се согласил да ги отстрани мините што ги поставил во областа за да можат бродовите да поминуваат.
За возврат, САД би ја укинале блокадата на иранските пристаништа и би дале одредени исклучоци од санкциите, што би му овозможило на Иран слободно да продава нафта на меѓународниот пазар.
Нацрт-договорот, исто така, вклучува обврска на Иран да не развива нуклеарно оружје, како и преговори за суспендирање на програмата за збогатување ураниум и отстранување на залихите од високо збогатен ураниум.
Два извори запознаени со преговорите за „Аксиос“ изјавија дека Иран веќе дал усни гаранции преку посредници за својата подготвеност да направи одредени отстапки во врска со прекинот на збогатувањето на ураниумот и откажувањето од дел од нуклеарниот материјал.
Според извештаите, во текот на 60-дневниот период, САД би се согласиле и на разговори за евентуално олеснување на санкциите и одмрзнување на иранските финансиски ресурси.
Досега нема официјален коментар од Белата куќа за наводите во извештајот.
