Нова Љубљанска банка (НЛБ) објави меморандум за понуда за доброволна јавна понуда за преземање на австриската Адико банка АГ, со што официјално започна процесот на една од најзначајните банкарски аквизиции во регионот. Адико банка работи на шест пазари во Централна и Југоисточна Европа, вклучувајќи ги Босна и Херцеговина, Србија, Хрватска, Словенија и Црна Гора.
Според објавените податоци, НЛБ нуди 29 евра по акција во готово, а понудата се однесува на сите акции на Адико банка. Словенска банка сака да стекне најмалку 75 проценти од правата на глас, што би ѝ овозможило целосна контрола врз банката.
Доколку НЛБ успее да ги преземе сите 19,5 милиони акции на Адико банка по цена од 29 евра по акција, вкупната вредност на трансакцијата би изнесувала околу 565 милиони евра.
Период на понуда
Периодот за прифаќање на понудата трае до 22 јули 2026 година, со можност за продолжување до крајот на октомври доколку се исполнат одредени услови.
НЛБ претходно го објави својот интерес за преземање на Адико Банка, нагласувајќи дека ја гледа оваа финансиска институција како стратешки важна аквизиција поради нејзиниот фокус на малопродажба и мали и средни претпријатија.
Потенцијалното преземање дополнително би ја зајакнало позицијата на НЛБ Групацијата во Југоисточна Европа, каде што веќе има силно присуство преку мрежа на банки и финансиски институции.
Формален чекор
Адико Банка произлезе од поранешниот систем Хипо Алпе-Адрија, а во последните години се фокусираше на дигитално банкарство и кредитирање на граѓани и бизниси.
Објавувањето на меморандумот претставува формален чекор во процесот на преземање, кој сè уште треба да помине низ регулаторни процедури и да ги добие потребните одобренија од надлежните институции.
И Raiffeisen Bank International AG (RBI) ја објави својата намера да поднесе доброволна јавна понуда за преземање на сите издадени и постоечки акции на Addiko Bank AG (Addiko) кои не се во сопственост на самата банка.
