Цените на нафтата пораснаа утрово во Азија откако американскиот претседател Доналд Трамп изјави дека одговорот на Иран на предлозите на САД за прекин на војната е „тотално неприфатлив“.
Техеран го испрати својот одговор преку Пакистан, кој служеше како посредник меѓу двете страни, барајќи итен прекин на конфликтот и гаранции дека нема да има понатамошни напади меѓу САД и Израел врз Иран, објави полуофицијалната иранска новинска агенција Тасним.
Меѓународниот репер Брент порасна за 3,8% на 105,20 долари (77,36 фунти) за барел, додека американската сурова нафта доби 4% на 99,30 долари.
Клучниот морски премин, Ормутскиот теснец, беше практично затворен кратко време по почетокот на војната на 28 февруари, сериозно нарушувајќи ги глобалните испораки на нафта и гас.
Одговарајќи на условите на Техеран, Трамп напиша на социјалните медиуми: „Тукушто го прочитав одговорот од таканаречените ирански „претставници“. Не ми се допаѓа – тотално е неприфатлив“.
Американските услови вклучуваа враќање на слободниот премин низ Ормускиот теснец и прекин на збогатувањето на ураниумот од страна на Иран, објавува американскиот портал „Аксиос“.
Израелскиот премиер Бенјамин Нетанјаху, исто така, изјави дека војната со Иран нема да заврши сè додека нивните залихи на збогатен ураниум не бидат „отстранети“.
Примирјето прогласено на почетокот на април за да се овозможи мировни преговори генерално се почитува, и покрај повремените размени на оган.
На 21 април, Трамп го продолжи прекинот на огнот на неодредено време за да му даде шанса на Иран да презентира „унифициран предлог“.
Цените на енергијата флуктуираа диво од почетокот на конфликтот, додека цената на нафтата од типот Брент повторно се искачи над 100 долари за барел откако прекинот на огнот стапи на сила на 8 април.
Ормускиот теснец, низ кој нормално минуваат околу една петтина од светските залихи на нафта и гас, е практично затворен откако Техеран се закани дека ќе нападне бродови што ќе се обидат да поминат, како одговор на нападите на САД и Израел.
Големите енергетски компании забележаа пораст на профитот бидејќи цените на нафтата и гасот нагло пораснаа на светските пазари.
Компанијата „Арамко“ во неделата објави дека нејзината заработка во првите три месеци од оваа година се зголемила за повеќе од 25% во споредба со истиот период во 2025 година.
Извршниот директор на „Арамко“, Амин Насер, изјави дека нејзиниот нафтовод низ Саудиска Арабија „се покажал како клучна артерија за снабдување“ и ѝ помогнал на компанијата да избегне прекини во транспортот предизвикани од војната со Иран.
Минатиот месец, „Бритиш петролеум“ објави дека нејзината добивка се зголемила повеќе од двојно во првите три месеци од годината, додека „Шел“ минатата недела објави дека нејзината заработка исто така значително се зголемила.
