Меѓународниот монетарен фонд (ММФ) ја намали прогнозата за раст за земјите од Блискиот Исток поради војната со Иран и предупреди дека продолжениот конфликт може да изврши дополнителен притисок врз економиите на регионот.
Извозниците кои се потпираат на стратешкиот Ормузски теснец, кој останува во голема мера блокиран, ќе видат намалување на нивните економии повеќе од земјите со пристап до поразновидни трговски патишта, соопшти ММФ, цитиран од „Bloomberg“.
Се очекува економијата на Катар, еден од најголемите извозници на течен природен гас во светот, да се намали за 8,6% оваа година, што е намалување за речиси 15 процентни поени од октомвриската прогноза на фондот со седиште во Вашингтон. Бруто домашниот производ (БДП) ќе се намали за 6,8% во Ирак и 6,1% во Иран во истиот период.
Се очекува Саудиска Арабија и Обединетите Арапски Емирати (ОАЕ), двете најголеми економии во Персискиот Залив, да пораснат за 3,1 процент, што е намалување за 0,9 процентни поени и 1,9 процентни поени, соодветно, од нивната претходна прогноза.
„Затворањето на Ормутскиот теснец, прекините во производството на нафта и гас и сериозните влијанија врз воздушниот сообраќај кон и низ Персискиот Залив имаат непосредни економски последици“, соопшти ММФ.
Директорот на ММФ за Блискиот Исток и Централна Азија, Џихад Азур, рече дека ефектите од војната би можеле да се влошат ако конфликтот продолжи подолго.
Фондот оваа недела ја намали својата прогноза за глобален раст на 3,1 процент според пооптимистичко сценарио, во кое конфликтот е релативно краткотраен, а цените на нафтата во просек се 82 долари за барел. Во најлошото сценарио, во кое енергетската инфраструктура претрпува многу поголема штета, глобалниот раст би паднал на помалку од 2%.
ММФ нема конкретни очекувања за тоа кое сценарио е поверојатно да се материјализира, рече Азур во интервју за „Bloomberg“ во среда.
„Референтното сценарио е сценариото врз кое ги базиравме нашите проекции, но со оглед на неизвесноста околу шокот, моравме да развиеме друго сценарио“, додаде тој.
Војната, која започна со заеднички американско-израелски бомбардирања на Иран на 28-ти февруари, веќе одзеде илјадници животи. Одмаздничките напади на Иран ги насочија кон земјите од Заливот и оштетија клучни енергетски објекти, вклучувајќи ја и фабриката за течен природен гас Рас Лафан во Катар.
Долгорочното влијание на војната останува нејасно и многу зависи од тоа дали ќе се одржи прекинот на огнот постигнат минатата недела меѓу САД и Иран и дали ќе се воспостави стабилноста, соопшти ММФ.
„Иако штетата врз производството и извозот на јаглеводороди е главниот фактор, големите ревизии надолу, исто така, одразуваат пониска економска активност без јаглеводороди, бидејќи производството и услугите (на пр., туризмот и логистиката) се исто така погодени“, додаде фондот.
„Војната на Блискиот Исток е сериозен шок со силно влијание врз регионот, но и со последици и реперкусии низ целиот свет. Земјите во регионот не се погодени на ист начин. Ова е она што ја одразува асиметријата на шокот“, рече Азур.
