Претседателот на Светска банка, Аџај Банга, предупреди на претстојна глобална криза со работните места, која би можела да се влоши дури и по завршувањето на вооружените конфликти.
Според неговите зборови, изнесени во пресрет на пролетните состаноци на Меѓународниот монетарен фонд (ММФ) и Светската банка во Вашингтон, во следните 10-15 години, околу 1,2 милијарди луѓе во земјите во развој ќе влезат во работоспособна возраст. Сепак, со сегашните економски трендови, ќе бидат создадени само околу 400 милиони работни места. Ова значи потенцијален недостиг од речиси 800 милиони работни места.
Според Банга, воениот конфликт меѓу САД, Израел и Иран ги засенува другите економски предизвици на краток рок, но не треба да го одвлекува вниманието од долгорочните ризици.
Тој ја нагласи потребата владите и меѓународните институции да работат паралелно за да се справат со сегашните кризи и да создадат одржливи економски услови. Меѓу приоритетите се проширувањето на пристапот до електрична енергија и чиста вода, како и стимулирањето на инвестициите и вработувањето.
Светската банка соопшти дека ќе соработува со земјите во развој за подобрување на регулаторната средина и отстранување на пречките за бизнисот, вклучително и преку мерки за транспарентност, мерки против корупција и реформи во законите за труд и трговија.
Банга предупреди дека недостатокот на доволно работни места може да доведе до сериозни последици, вклучително и зголемена нелегална миграција и глобална нестабилност. Според Обединетите нации (ОН), до 2025 година, повеќе од 117 милиони луѓе низ целиот свет ќе бидат раселени.
Во исто време, меѓународната институција планира иницијативи за подобрување на пристапот до чиста вода за уште 1 милијарда луѓе, како и проекти за електрификација и развој на здравството, особено во Африка.
Според Банга, приватниот сектор ќе игра клучна улога во создавањето работни места, при што инвестициите ќе бидат насочени кон области како што се инфраструктурата, земјоделството, примарната здравствена заштита, туризмот и производството.
