Русија ги зголеми трошоците во март во очекување на нагло зголемување на приходите од скокот на цената на нафтата предизвикан од војната на Блискиот Исток.
Трошењето во март се зголеми за 44% во однос на претходната година, по зголемувањето од 16% во февруари, според пресметките на „Bloomberg“. Дефицитот изнесуваше 1,1 трилион рубли во март.
Дефицитот во првиот квартал достигна 4,6 трилиони рубли (58,6 милијарди долари), надминувајќи ја целта од 3,8 трилиони рубли за целата година, според податоците на Министерството за финансии.
Буџетскиот дефицит се зголемува бидејќи повисоките цени на нафтата минатиот месец само ќе ги зголемат приходите од април. Државните трошоци се типично високи во првите месеци од годината, при што плаќањата по договори доаѓаат однапред, особено во услови на тековната војна во Украина.
Приходите од данок на нафта во март се намалија за речиси половина во однос на претходната година. Даноците се пресметуваат со едномесечно задоцнување во однос на пазарните цени за Урал. Во февруари, цената на овој вид нафта во просек беше под 45 долари за барел, според владини податоци, што е далеку под 59 долари за барел проектирани во буџетот на земјата за 2026-та година. Цените се намалија бидејќи другите купувачи на руска сурова нафта побараа големи попусти поради тековните енергетски санкции, а посилната рубља, исто така, влијаеше врз приходите.
Но, откако војната на Блискиот Исток ги зголеми цените на глобалните пазари на нафта и гас, цената на нафтата што се користеше за пресметување на даноците на Русија во април беше поставена на 77 долари за барел, соопшти Министерството за економија. Тоа покажува нагло зголемување на буџетските приходи овој месец.
Неочекуваниот приход би можел да достигне околу 900 милијарди рубли, надоместувајќи го дефицитот на приходи од 600 милијарди рубли во првиот квартал.
Но, повисоките приходи веројатно нема целосно да ги смират загриженостите за буџетскиот дефицит, велат аналитичарите.
Русија планираше да ги ограничи воените трошоци оваа година, иако тоа останува врвен буџетски приоритет. Но, економистите и другите експерти ја доведоа во прашање изводливоста на таа цел со оглед на недостатокот на напредок во мировните преговори со Украина.
Претседателот Владимир Путин ја предупреди владата да не ги троши дополнителните приходи генерирани од конфронтацијата на американскиот претседател Доналд Трамп со Иран.
„Може да постои искушение да се искористи ситуацијата, да се добијат неочекувани приходи и, така да се каже, да се потрошат“, рече Путин на 26-ти март. „Мора да останеме претпазливи“, додаде тој.
