„Ѕkoda“ го продолжува својот силен моментум на европскиот пазар на електрични возила преку значителни подобрувања на моделите „Elroq“ и „Enyaq“ за 2026-та година.
За новата моделска година, двата автомобили добиваат целосно редизајниран инфозабавен систем базиран на „Android“.
Интерфејсот е поедноставен, со побрзо пребарување, прилагодливи кратенки и поголеми опции за персонализација. Воведена е и интегрирана продавница за апликации, така што услуги како што се „Spotify“ и „YouTube“ сега се директно достапни во возилото.
Дигитализацијата оди чекор понатаму со воведување на дигитален клуч преку апликацијата „MyЅkoda“, кој овозможува заклучување, отклучување и стартување на возилото преку телефонот, како и споделување на пристапот со други корисници.
Системот за полнење е исто така подобрен, со подлабока интеграција на мрежата „Powerpass“ и поддршка за „Plug & Charge“, што ја елиминира потребата од картички и дополнителни апликации.
Технолошките подобрувања вклучуваат поддршка за функцијата V2L, која овозможува напојување на надворешни уреди, како и подобрено возење со „една педала“ со пофина контрола на регенеративното сопирање.
„Ѕkoda“ додаде и практични решенија како што се преден багажник од 21 литар, безжично полнење до 25W и помоќни USB-C порти.
Безбедноста е подигната на повисоко ниво преку системот „Travel Assist 3.0“, со подобро одржување на лента, понапредна помош за промена на лента и функција за автоматско запирање во итни ситуации. Новите сензори и камери дополнително го подобруваат откривањето на возила, велосипедисти и други учесници во сообраќајот.
Важна новина се „LFP“ батериите во основните верзии, кои носат пониски трошоци, подолг век на траење и подобра прилагодливост кон секојдневното полнење.
