Досега, роботот работел во смени од 10 часа, пет дена во неделата, што значи дека имал слободен викенд.
Компанијата BMW започна нов пилот-проект за воведување на хуманоидни роботи во производството.
По тестирањето во фабриката во Спартанбург, Јужна Каролина, следниот чекор е фабриката во Лајпциг.
Станува збор за проект наречен „Physical AI“, кој се спроведува во соработка со компанијата Hexagon. Нивниот хуманоиден робот AEON треба да помогне во склопувањето на компоненти и високонапонски батерии.
Првите тестови веќе беа спроведени кон крајот на минатата година во фабриката во Лајпциг, а дополнителни тестови се планирани за април.
Пилот-фазата на проектот треба да започне во лето.
Претходно тестирање во САД
Новиот проект се темели на претходното тестирање на хуманоидниот робот Figure 02 на компанијата Figure AI.
Роботот работел во фабриката во смени од 10 часа, пет дена во неделата, десет месеци.
Во тој период, тој учествувал во производството на повеќе од 30.000 примероци од моделот BMW X3. Неговата задача била прецизно да отстранува и поставува метални делови во процесот на заварување – работа што бара голема брзина и точност, но е физички многу напорна за работниците.
За време на тестирањето, роботот поместил повеќе од 90.000 компоненти и евидентирал околу 1.250 работни часови.
Роботи за помош на работниците
BMW истакнува дека тестовите покажале дека хуманоидните роботи можат да донесат конкретни придобивки во реални услови на производството, особено во монотони, ергономски тешки или потенцијално опасни работни места.
Компанијата нагласува дека целта не е да се заменат работниците, туку да се ослободат вработените и да се подобрат условите за работа, иако признава дека автоматизацијата може да ја зголеми конкурентноста на производството.
Тренд во автомобилската индустрија
BMW не е единствениот производител што ја истражува оваа технологија.
Mercedes-Benz веќе тестира хуманоидни роботи во фабрика во Берлин, каде што роботот Apollo помага со логистиката и контролата на квалитетот.
Од друга страна, „Хјундаи“ планира поширока примена на хуманоидни роботи во американските фабрики до 2028 година, додека „Тесла“ го развива роботот „Оптимус“, кој во иднина би можел да има многу поширока примена од работата во фабриките.
