Израелското Министерство за одбрана во саботата објави дека Израел започнал „превентивен напад“ врз Иран, а иранските медиуми објавија дека беспилотни летала погодиле цели во Техеран, според светските агенции.
Иранските медиуми објавија дека во главниот град на Иран, Техеран, се слушаат експлозии и дека се гледаат два столба црн чад, но дека нивната причина е непозната.
Израелската војска во саботата објави дека вклучила сирени за воздушен напад во области низ Израел „за да ја подготви јавноста за можноста за лансирање ракети кон Израел“ како одмазда.
Според „Њујорк тајмс“, САД и Израел го нападнале Иран заедно. Американски функционер изјави дека американските воени напади врз Иран се во тек.
Американски функционер изјави за Ал Џезира дека нападите врз Иран биле извршени како заедничка американско-израелска воена операција.
Нападите се случиле во сабота наутро, првиот работен ден од неделата во Иран, додека милиони луѓе биле на работа, а децата на училиште. Жителите на Техеран опишуваат сцени на паника и хаос.
Според иранскиот весник „Шарг“, густ чад се издига од населбата во Техеран каде што се наоѓа врховниот лидер ајатолахот Али Хамнеи. Жителите, исто така, пријавиле чад од областа, каде што се наоѓаат претседателската палата и Советот за национална безбедност.
