Американскиот претседател Доналд Трамп денес изјави дека си дава „десет дена“ да одлучи дали е можен договор со Иран, предупредувајќи дека во спротивно „ќе се случат лоши работи“. Вашингтон и Техеран се вратија на дијалог овој месец, за прв пат од војната во јуни 2025 година. Досега, тие одржаа две рунди разговори во обид да најдат решение за нивните меѓусебни спорови.
Но, двете земји паралелно се закануваат една на друга. САД распоредија голем број свои сили во соседството на Иран, а Техеран спроведува воени вежби со Русија во Оманскиот Залив. „Можеби ќе треба да одиме чекор понатаму, но можеби нема, можеби ќе постигнеме договор. Веројатно ќе дознаете во следните 10 дена“, рече американскиот претседател во Вашингтон.
САД го предупредија Иран еден ден претходно дека би било „мудро“ да се склучи договор. „Постојат многу причини и аргументи во корист на нападот врз Иран“, изјави портпаролката на Белата куќа, Каролин Ливит.
Израел, американски сојузник и заколнат непријател на Иран, му се закани на Техеран со масовен одговор во случај на напад врз негова територија. „Доколку ајатолаховите направат грешка и нè нападнат, ќе се соочат со одговор што не можат ни да го замислат“, предупреди премиерот Бенјамин Нетанјаху.
Вчера, Техеран објави дека подготвува „рамка“ за напредок во преговорите со Вашингтон, кои беа обновени на 6 февруари во Оман, со посредство на таа земја. Двете страни се разликуваат по самата содржина на преговорите, пишува Франс Прес.
Иран негира дека сака нуклеарно оружје, па затоа сака да ги ограничи разговорите исклучиво на својата нуклеарна програма, барајќи укинување на санкциите што ја задушуваат неговата економија. Вашингтон, од друга страна, верува дека решението мора да ја вклучува и иранската програма за балистички ракети и прашањето за поддршка на регионалните вооружени групи непријателски настроени кон Израел.
Во 2015 година, Иран потпиша договор со шест светски сили во кој се согласи да ја ограничи својата нуклеарна програма во замена за укинување на санкциите. САД се повлекоа од договорот во 2018 година за време на првиот мандат на претседателот Доналд Трамп, по што Вашингтон повторно воведе строги санкции врз Иран.
Иран одговори со кршење на ограничувањата на договорот, повторно надополнување на своите залихи од збогатен ураниум, негово рафинирање до фисиона чистота и инсталирање центрифуга за зголемување на своето производство. Откако се врати во Белата куќа, Трамп му се заканува на Иран дека ќе постигне нов договор бидејќи во спротивно „последиците би биле невозможни“.
