Додека експертите за долговечност најчесто препорачуваат балансирана исхрана, интегрални житарки, јаткасти плодови и што е можно помалку шеќер, многумина претпочитаат да ги слушаат советите на оние кои живееле долг и исполнет живот. Една од нив е 104-годишната Елизабет Милнер, која својата долговечност ја припишува на едноставна комбинација од две намирници – една здрава и една слатка, пишува порталот Food Bible.
Елизабет Милнер е родена во Шкотска во 1921 година. Таа ја преживеала Втората светска војна, а со својот сопруг Алфред, за кого се омажила во 1944 година, одгледала две деца во Јоркшир. Денес живее во Домот за стари лица Кентфорд Манор во Њумаркет, каде што го прославила својот 104-ти роденден во декември.
Зборувајќи за тајната на својата долговечност, Милнер вели дека верува во рамнотежа – во комбинирање на „доброто“ и „лошото“. Намирниците кои, според неа, заслужуваат дел од заслугите за нејзината виталност се зеленчукот и чоколадото.
Зошто зеленчукот е толку важен
Британската национална здравствена служба (NHS) препорачува консумирање на пет порции овошје и зеленчук дневно, каде што една порција е околу 80 грама. Зеленчукот е одличен извор на диететски влакна и може да го намали ризикот од срцеви заболувања, мозочен удар и некои видови рак.
Покрај тоа, зеленчукот е богат со фолна киселина, витамин Ц и калиум, придонесува за здравјето на дигестивниот систем и има ниска содржина на масти. Темнозелениот лиснат зеленчук како што се кељот, спанаќот и блитвата, како и брокулата, прокељот и краставиците се меѓу најхранливо богатите видови.
Умереност кога станува збор за чоколадо
Кога станува збор за чоколадо, експертите претпочитаат темно чоколадо со висока содржина на какао. Истражувањата покажуваат дека може да има корисен ефект врз здравјето и да го намали ризикот од срцеви заболувања. Можните придобивки вклучуваат подобра функција на мозокот, заштита на кожата од штетните ефекти на сонцето и намалување на нивото на „лош“ холестерол.
Порталот Healthline советува умерена потрошувачка на темно чоколадо. Иако млечното чоколадо генерално не се смета за здрав избор, некои видови содржат релативно високи нивоа на калциум и соединенија кои можат позитивно да влијаат на расположението. Меѓутоа, ако веќе избирате – темното чоколадо со висока содржина на какао останува подобра опција.
