Додека многу производители на автомобили ги напуштаат седаните со пет врати во корист на попрофитабилниот сегмент на компактни кросовери, „Dacia“ кон крајот на 2026-та година ќе воведе нов модел од Ц-сегментот.
Името засега се чува во тајност – моделот моментално е познат како „C-Neo“, но се очекува сериската верзија да добие поинакво име.
Сепак, познато е дека станува збор за вкрстување помеѓу хечбек и караван, со должина од околу 4.500 mm, што треба да обезбеди солиден простор за задните патници и багажникот. Нашите колеги од италијанското издание „AlVolante“ ја прикажаа својата визија за изгледот на новиот модел, користејќи фотографии од тест-прототипи како основа.
Познат изглед
Како и повеќето модели на „Dacia“ (со исклучок на „Spring“), и овој автомобил е базиран на платформата на „Renault Clio“. Дизајнот, добиен по обработка на првите шпионски фотографии од прототипите, открива издолжена силуета со преден дел што наликува на оној кај покомпактниот „Sandero“. Ова особено се забележува кај дизајнот на фаровите, како и кај силно наклонетиот заден прозорец.
Јасно се забележуваат и елементи инспирирани од светот на кросоверите, како црните пластични заштитни облоги долж долниот дел од каросеријата и кровните шини. Во согласност со актуелните пазарни трендови, „C-Neo“ би можел да се нуди исклучиво во оваа конфигурација, без верзија од типот „Streetway“, каква што постои кај „Sandero“.
Цени од 17.000 евра
Понудата на мотори најверојатно ќе биде споделена со останатите модели на брендот. Речиси сигурна е употребата на новиот 1,2-литарски турбо мотор со три цилиндри и околу 120 ks, кој ќе се комбинира и со шестстепен мануелен менувач и со роботизиран менувач со двојна спојка. Моделот ќе биде достапен и во благи хибридни и „LPG“ верзии.
Основната верзија, со почетна цена од околу 17.000 евра, најверојатно ќе биде опремена со 1,0 турбо бензински мотор со 110 ks. За 1,8-литарскиот целосно хибриден мотор, кој ќе се нуди исклучиво со автоматски менувач и моќност од 158 ks, се претпоставува почетна цена од околу 25.000 евра.
