Американскиот претседател Доналд Трамп изјави дека рускиот претседател Владимир Путин му кажал дека Украина наводно нападнала една од неговите резиденции со дронови, оценувајќи дека таков потег „не е добар“, иако Киев веднаш ги отфрли тврдењата.
„Не ми се допаѓа. Тоа не е добро“, рече Трамп, додавајќи: „Слушнав за тоа утрово. Дали знаете кој ми го кажа тоа? Претседателот Путин. Тој ми кажа рано утрово дека бил нападнат. Тоа не е добро. Не е добро. Не заборавајте на Томахавките, јас ги сопрев, не го сакав тоа. Едно е да се биде офанзивен, бидејќи и тие (русите) беа офанзивни. Но, друго е да се нападне неговата куќа. Не е вистинско време за ништо од тоа. Денес дознав за тоа од претседателот Путин и бев многу лут“
На прашањето дали има докази за нападот, тој рече: „Ќе дознаеме“. Тој додаде дека е „можно“ обвинувањата да бидат лажни и дека нападот никогаш не се случил, но забележа: „Но, претседателот Путин ми кажа утрово дека се случил“.
Ова се првите изјави на Трамп за случајот откако рускиот министер за надворешни работи Сергеј Лавров јавно упати обвинувања против Украина.
„Всушност, само што слушнав за тоа, но не знам ништо за тоа. Тоа би било многу лошо. Тоа не би било добро“, им рече Трамп на новинарите пред средбата со израелскиот премиер Бенјамин Нетанјаху во неговото одморалиште Мар-а-Лаго во Флорида.
Трамп го опиша телефонскиот разговор со Путин како „продуктивен“, но додаде дека сè уште има отворени прашања за постигнување мировен договор за Украина.
„Беше многу продуктивен разговор. Имаме некои многу тешки прашања, како што можете да замислите“, рече Трамп. „Имаме неколку прашања за кои се надевам дека ќе ги решиме и, ако ги решиме, може да има мир“.
Рускиот министер за надворешни работи Сергеј Лавров претходно тврдеше дека Украина извршила напад со беспилотни летала врз резиденцијата на Путин во регионот Новгород синоќа. Лавров рече дека поради ова, Москва ќе „ја ревидира својата преговарачка позиција“, додавајќи дека тоа е, како што изјави, „последен премин на режимот во Киев кон политиката на државен тероризам“.
Советникот за надворешна политика на Путин, Јуриј Ушаков, рече дека рускиот претседател го информирал Трамп за наводниот напад за време на телефонски разговор и дека американскиот претседател реагирал многу остро на тоа.
„Американскиот претседател беше шокиран од оваа информација, буквално ужаснат, не можеше да замисли такви луди дејствија. И, како што беше кажано, ова несомнено ќе влијае на пристапот на Американците кон соработката со Зеленски“, рече Ушаков.
Тој додаде и дека Путин му рекол на Трамп дека Русија сега ќе ја ревидира својата позиција за мир, тврдејќи дека Москва, како што изјави, „нема алтернатива“.
Украинскиот претседател Володимир Зеленски претходно ги отфрли руските тврдења за нападот врз резиденцијата на Путин, велејќи дека Москва се обидува да оправда нови напади врз Украина, да купи време и да ја префрли вината на Киев во очите на САД.
