„Instagram“ воведува нова промена што ќе влијае на начинот на кој корисниците ги означуваат своите објави на оваа социјална мрежа. Отсега, може да се користат максимум пет хаштагови (#) по објава, вклучително и на содржината на „Reels“.
Според компанијата, целта на оваа одлука е да се намали несоодветната и прекумерна употреба на хаштагови, како и да се подобри квалитетот на содржината што се појавува во резултатите од пребарувањето.
Директорот на „Instagram“, Адам Мосери, истакна дека поголем број хаштагови не носи автоматски подобра видливост, а прецизните и релевантни ознаки се многу поефикасни од голем број генерички хаштагови.
„Instagram“ долго време нагласува дека хаштаговите повеќе не играат клучна улога во зголемувањето на досегот на објавите, како што беше случајот порано. Наместо тоа, алгоритмот сè повеќе го фаворизира квалитетот на содржината, интеракцијата со публиката и јасно дефинираната тема на објавување.
Оваа промена е дел од поширока стратегија на платформата насочена кон намалување на спам содржината и поттикнување на автентична комуникација меѓу корисниците.
