Американскиот претседател Доналд Трамп бара од Федералните резерви да ги намалат каматните стапки, а тоа дефинитивно би го ослабнало кредибилитетот на централната банка, како и нејзината способност да ја ограничи инфлацијата, во време кога се очекува раст на цените.
Во меѓувреме, кандидатите за функцијата претседател на Федералните резерви – Кевин Хасет, долгогодишен советник на Трамп, и Кристофер Волер, стојат помеѓу барањата на Трамп и потребата од сериозно управување со Федералните резерви.
Трамп продолжува да врши притисок врз идниот претседател на Федералните резерви. Светските медиуми објавуваат дека идниот претседател на Федералните резерви се соочува со тешка задача, да го смири турбулентниот финансиски пазар, да ги ублажи инфлациските притисоци и, како што вели Политико – да го смири претседателот чија опсесија со пониски каматни стапки доминира поголемиот дел од неговиот мандат.
Федералниот комитет за отворен пазар (FOMC) на американската централна банка на 10 декември ќе одлучи дали да продолжи со намалувањето на краткорочните каматни стапки, по намалувањето од 0,25 процентни поени во октомври, или да ги задржи на сегашните нивоа. За разлика од претходните состаноци, исходот од оваа седница е понеизвесен поради недостатокот на клучни економски податоци, предизвикани од затворањето на федералната влада.
Бирото за статистика на трудот нема да објави податоци за инфлацијата и вработеноста за октомври, бидејќи тие не беа собрани за време на блокадата. Податоците од ноември ќе бидат објавени дури по состанокот – извештајот за вработеноста на 16 декември, а извештајот за инфлацијата на 18 декември.
Состанокот на FOMC оваа недела ќе почне да ги обликува очекувањата во врска со наследникот на Џером Пауел за претседател на ФЕД, кого се очекува да го назначи Трамп. ФЕД е заглавен помеѓу широко распространетите загрижености за инфлацијата и барањата на Трамп за намалување на каматните стапки, објавува Ројтерс.
„Кој и да го наследи Пауел ќе се најде во празнина. Трамп ќе продолжи да инсистира на политика на ниски каматни стапки, што ја зголемува инфлацијата, а во исто време ќе бара да објават дека ја победиле. Една од идеите на Трамп е семејствата што заработуваат помалку од 100.000 долари годишно да добијат чек од 2.000 долари, што многу потсетува на политиката на поранешниот американски претседател Џо Бајден за време на пандемијата, кој ја крена инфлацијата на ниво незабележано во последните четири децении“, оценуваат експертите.
Инвеститорите веќе приватно го предупредиле Министерството за финансии за ризиците доколку Хасет го преземе кормилото на централната банка, како и за ризиците дека, под влијание на Трамп, идната политика на Федералните резерви повеќе нема да се води само од знаење и политики од учебниците за финансии и економија, туку и од таблоидите во весниците.
Во исто време, поделбата во рамките на FOMC помеѓу „јастреби“ и „гулаби“ станува сè поизразена. Јастребите се за построга монетарна политика и се противат на понатамошно намалување на каматните стапки поради ризиците од инфлација, додека гулабите ја поддржуваат олабавувачката политика за да се помогне на пазарот на трудот кој покажува знаци на слабеење.
Гласањето од седницата на крајот на октомври јасно ги покажа тие поделби. Од вкупно 12 членови со право на глас, двајца беа против одлуката на мнозинството за намалување на каматните стапки за 0,25 проценти, еден беше за воопшто да нема намалување на стапката, додека другиот се залагаше за поагресивно намалување од 0,5 процентни поени. Иако несогласувањата не се невообичаени во FOMC, состанокот во октомври беше посебен бидејќи приговорите дојдоа од спротивставени страни – и јастреби и поблаги. Ваква ситуација се случила многу ретко во историјата на ФЕД.
Неизвесноста околу претстојната одлука веќе предизвика зголемена волатилност на финансиските пазари. Индексот VIX, кој ја мери волатилноста на берзата, го достигна највисокото ниво од април по најавите на Трамп за царините. Волатилноста на пазарот на обврзници, исто така, се зголеми. Иако дел од волатилноста произлегува од високите вреднувања на акциите, неодлучноста на ФЕД дополнително ги вознемирува пазарите.
Како најверојатен исход, аналитичарите предвидуваат дека одлуката ќе биде донесена со поголемо противење отколку во октомври, веројатно три или четири члена ќе бидат против одлуката на мнозинството. Без оглед на тоа дали одлуката е „јастребска“ или „помирлива“, таков развој на настаните веројатно би значел продолжена зголемена волатилност и би го пренасочил вниманието на инвеститорите кон следниот состанок на 28 јануари, кога ќе се промени и составот на гласачите на FOMC.
Најлошото, но малку веројатно сценарио би било пет несогласувања или дури и нерешен резултат, што никогаш порано не е видено во историјата на FOMC. Таквиот исход дополнително би ги потресол пазарите и би го довел во прашање авторитетот и стабилноста на раководството на ФЕД.
Намалувањето на каматната стапка од 0,25 проценти е исходот што го очекуваат пазарите, меѓутоа, клучниот сигнал ќе биде тонот на објавата и новите економски проекции – дали ФЕД е подготвен за понатамошно намалување на стапките или ќе стане значително повнимателен по овој потег.
