Вкупно 1,25 милијарди телефони ќе бидат испорачани во 2025-та година, што е зголемување од 1,5 проценти во однос на 2024-та година.
Според извештајот на „International Data Corporation“ (IDC), „Apple“ ќе испорача повеќе од 247 милиони „iPhone“ телефони во 2025-та година, поттикнати од силната побарувачка за време на празничниот квартал, растечкиот интерес за нови „iPhone“ телефони во Кина и пазарите во развој, како и разни промоции за време на сезоната на подароци.
Според месечните податоци за продажба на „IDC“ во Кина, силната побарувачка за „iPhone 17“ му помогна на „Apple“ да го обезбеди првото место во октомври и ноември 2025-та година. Побарувачката ги надмина сите очекувања и му овозможи на „iOS“ да ги надмине „Android“ и „HarmonyOS“ на „Huawei“ во однос на годишниот раст.
Благодарение на овие бројки, „IDC“ го ревидираше претходно проценетиот пад на мобилните испораки на „Apple“ во Кина од 1 процент за 2025-та година. Новата прогноза сега покажува раст од 3 проценти. Сличен тренд се забележува и на пазарите во САД и Западна Европа.
Сепак, според „IDC“, 2026-та година нема да биде толку позитивна. Се предвидува пад на испораките од 1 процент, главно поради зголемувањето на цените на компонентите за меморија, што би можело да ја зголеми просечната продажна цена на мобилен телефон на 465 долари. Покрај тоа, гласините на „Apple“ за одложување на лансирањето на основниот модел „iPhone 18“ од есента 2026-та година до почетокот на 2027-ма година би можеле негативно да влијаат на прелиминарните резултати на целиот пазар и да придонесат за пад на испораките од 1 процент во 2026-та година.
Сепак, иако прогнозите укажуваат на стабилизација на пазарот и умерен раст, аналитичката проценка на „Counterpoint Research“, се разликува од предвидувањата на „IDC“, особено кога станува збор за „Apple“.
За потсетување, податоците на „Counterpoint“ наведуваат дека „Apple“ треба да испорача 243 милиони „iPhone“ телефони во 2025-та година, што би можело да му даде на „Apple“ удел од 19,4 проценти на глобалниот пазар и да го постави на самиот врв, пред „Samsung“.
