17,4% од населението на Европската Унија се сметало себеси за сиромашно во 2024-та година, што е подобрување во споредба со нивото од 19,1% во 2023-та година и во споредба со 2015-та година (27,1%), според податоците на Евростат.
Меѓу земјите од ЕУ, овој удел е највисок во Грција (66,8%), по што следат Бугарија (37,4%) и Словачка (28,7%). На другиот крај од скалата, најниските удели се регистрирани во Холандија и Германија (и двете 7,3%) и Луксембург (8,5%).
Индикаторот за „субјективна сиромаштија“ е новоразвиена област што ги надополнува традиционалните индикатори како што се уделот на луѓе кои живеат во ризик од сиромаштија и тешка материјална депривација, кои живеат во домаќинства со невработени и други. За разлика од другите индикатори за сиромаштија, субјективната сиромаштија има за цел да ги процени перцепциите на испитаниците за тешкотиите што ги имаат во „врзувањето крај со крај“, како што се наведува во истражувањето на статистичката служба.
Франција е една од ретките европски земји каде што субјективните стапки на сиромаштија се зголемија во текот на изминатата деценија, објавува „Euronews“. Според податоците на Евростат, од 2014-та година, Париз бележи зголемување од речиси 2% на бројот на луѓе кои доживуваат „тешкотии“ или „сериозни тешкотии“ во „врзувањето крај со крај“.
Освен Франција, стапките на сиромаштија се зголемија само во северна Европа во текот на изминатата деценија, со Данска (2,4%), Финска (2%), Шведска (2,8%) и, надвор од Европската унија (ЕУ), Норвешка (4,7%).
Кои земји од ЕУ забележаа најголемо намалување на стапките на сиромаштија?
Во исто време, многу земји од Источна и Јужна Европа значително ги намалија стапките на сиромаштија. Кипар е лидер во ЕУ (38%), по што следуваат Хрватска (34,6%), Унгарија (26,8%), Бугарија (26,5%) и Романија (21,8%).
Стапките на сиромаштија кај малолетниците остануваат загрижувачки
Гледајќи ги возрасните групи, најмладата генерација се бори најмногу.
Стапката на сиромаштија кај лицата под 18 години е највисока со 20,6%, додека лицата на возраст од 65 години и повеќе имаат најниска стапка од 14,9%.
Сите возрасни групи бележат пад на нивните вкупни стапки од 2023-та до 2024-та година, објавува Евростат.
„Најголемиот пад е забележан во возрасната група од 18 до 64 години – 1,8 процентни поени, додека намалувањето и кај најмладите и кај најстарите групи беше 1,6 процентни поени“, исто така изјави Европскиот завод за статистика.
