Финската компанија „Oura“, позната по своите паметни прстени што го следат здравјето и спиењето, планира наскоро да ја прошири употребата на овој уред, не само за фитнес, туку и за дигитална идентификација и плаќања.
На конференцијата „Web Summit“ во Лисабон, извршниот директор на „Oura“, Том Хејл, ја истакна визијата прстенот да биде „вашиот клуч, вашиот паричник и вашата лична карта“.
Според него, идејата е наместо лозинки или физички картички, корисниците да користат биометриски прстен како безбеден начин за идентификување и плаќање.
Компанијата веќе презеде чекори во оваа насока, а во 2023-та година ја купи компанијата за технологија за идентитет „Proxy“.
Сепак, не е прецизирано кога овие иновации ќе им бидат достапни на корисниците. Том Хејл нагласи дека во овој момент не планираат да станат „целосен давател на дигитална идентификација“, туку да понудат дополнителна вредност преку биометриска автентикација и опции за плаќање.
Компанијата собра 900 милиони долари во рундата за финансирање од Серијата Е оваа година, проценувајќи ја компанијата на околу 11 милијарди долари. Парите ќе ѝ помогнат да се прошири глобално и да развие нови функции.
Аналитичарите велат дека „Oura“ има добри шанси да соработува со големи платни системи како што се „Visa“ и „Mastercard“, благодарение на растечката популарност на носливата технологија и подготвеноста на луѓето да прифатат дигитални решенија.
Од друга страна, техничките предизвици остануваат. На пример, вградувањето на „NFC“ чип (кој овозможува плаќања и идентификација) во уред мал како прстен не е лесно – сигналот може да биде слаб, а дел од сигналот може да се апсорбира преку кожата. Сепак, „Oura“ верува дека патот е изводлив и дека пречките се надминливи.
