Кога станува збор за исхраната и здравјето на срцето, најважно е да се држиме до основните правила: исхрана базирана на растенија, храна со незаситени масти и избегнување на масни меса и храна богата со натриум.
Истото важи и за пијалаците, најголемите виновници за здравјето на срцето се газираните пијалоци, диеталните газирани пијалоци и алкохолот. Како што истакнува Клиниката Кливленд, 90 проценти од срцевите заболувања можат да се спречат со поздрава исхрана и навики во начинот на живот, вклучувајќи намалување на внесот на сол, редовно вежбање и избегнување на пушење.
Иако многумина од нас може да се сметаат себеси за добро информирани за тоа што прави исхраната здрава за срцето, постои еден топол напиток кој често останува незабележан, а кардиолозите го препорачуваат секој ден. Тоа е зелениот чај. Лекарите истакнуваат дека зелениот чај го поддржува здравјето на срцето на неколку начини.
Кардиологот д-р Леонард Пјанко тврди дека зелениот чај е корисен затоа што е богат со антиоксиданси.
„Антиоксидансите можат да го спречат или поправат оштетувањето на клетките предизвикано од слободните радикали“, објаснува тој, забележувајќи дека слободните радикали се поврзани со воспаление кое ги влошува срцевите заболувања.
Друг кардиолог, д-р Кишан Парих, додава дека консумирањето зелен чај е поврзано со намалување на крвниот притисок кај луѓето со хипертензија, исто така благодарение на антиоксидансите. Овие соединенија ги опуштаат крвните садови, им помагаат да се прошират и да го подобрат протокот на крв.
Д-р Пјанко, исто така, објаснува дека зелениот чај може да го забрза метаболизмот.
„Зелениот чај може да го поттикне губењето на тежината со забрзување на метаболизмот“, што е важно бидејќи дебелината е фактор на ризик за срцеви заболувања. Исто така, зелениот чај не содржи калории“, нагласува тој.
Зелениот чај носи и други придобивки, вклучително и позитивен ефект врз мозокот – според претходните истражувања, може да ја подобри концентрацијата, расположението и меморијата. Студиите, исто така, покажаа дека неговите антиоксиданси помагаат во заштитата на коските и спречувањето на губењето на коските.
Сепак, д-р Пјанко предупредува да не се пие премногу.
„Прекумерното пиење може да предизвика вознемиреност и несоница бидејќи зелениот чај содржи кофеин“, потсетува тој, додавајќи дека доколку се сомневате, секогаш треба да се консултирате со лекар, особено ако земате лекови.
Кардиолозите нагласуваат дека зелениот чај е само еден дел од поголемата слика. Заменувањето на газираните и диеталните пијалаци со зелен чај е особено корисно, а во постудениот дел од годината, овој топол пијалок може да стане пријатна секојдневна навика. Кога температурите ќе се зголемат, едноставно можете да преминете на ладна верзија.
