„Deutsche Bank“ постави нови цели за профит и приходи за следните три години, бидејќи најголемиот германски заемодавач се обидува да ги убеди инвеститорите дека неговото долгогодишно закрепнување продолжува и дека може да се натпреварува со титаните од Волстрит.
Серијата цели за 2028-ма година е третата голема програма под раководство на извршниот директор Кристијан Зевинг, кој ја презеде банката кога беше во рецесија по години загуби.
Зевинг ја стабилизираше банката, враќајќи ја кон постојан профит, но некои инвеститори ја критикуваа „Deutsche Bank“ за нејзината прекумерна зависност од глобалното инвестициско банкарство и слабите перформанси во малопродажното банкарство.
„Deutsche Bank“ е во последната фаза од својот тековен тригодишен план. Повеќето аналитичари веруваат дека банката ќе ги постигне своите цели.
Меѓу клучните елементи на планот објавен во понеделник, „Deutsche Bank“ се стреми кон поврат на капиталот, клучен индикатор за профит, од повеќе од 13% до 2028-ма година, во споредба со нејзината моментална цел од повеќе од 10%.
Сака да ги зголеми приходите на околу 37 милијарди евра во 2028-ма година, во споредба со околу 32 милијарди евра во 2025-та година.
Банката, исто така, се стреми кон сооднос трошоци-приходи под 60% до 2028-ма година, во споредба со моменталната цел од под 65%.
„Нашата долгорочна визија е да бидеме европски шампион“, рече Зевинг во соопштението.
