Провајдерот на интернет инфраструктура Cloudflare денес беше недостапен околу три часа, со што беа исклучени милиони веб-страници и апликации, вклучувајќи ја социјалната мрежа X, ChatGPT и Dropbox.
Што е Cloudflare?
Cloudflare е глобална компанија за cloud computing и сајбер безбедност. Таа, меѓу другото, обезбедува центри за податоци, безбедност на веб-страници и е-пошта, заштита од губење на податоци и одбрана од сајбер закани. Компанијата вели дека Cloudflare е „имунолошкиот систем на интернетот“, со технологија што се наоѓа помеѓу клиентите и надворешниот свет, блокирајќи милијарди сајбер напади секој ден. Исто така, ја користи својата глобална инфраструктура за да го забрза интернет сообраќајот. Заработува повеќе од 500 милиони долари по квартал од речиси 300.000 корисници во 125 земји.
Зошто е важен?
Cloudflare е една од неколкуте компании кои заедно сочинуваат клучни елементи на „нервниот систем“ на интернетот – така што кога нивните услуги ќе откажат, веб-страниците можат практично да одат надвор од мрежата, што влијае на милиони луѓе и бизниси. ChatGPT и социјалната мрежа X во сопственост на Илон Маск беа меѓу поголемите сајтови погодени од денешниот прекин. Според една проценка, Cloudflare опслужува една од пет веб-страници во светот.
Кој друг беше погоден од прекинот на Cloudflare?
Корисниците на неколку високо посетени сајтови пријавија дека биле недостапни во исто време со Cloudflare. Меѓу нив се сајтот за обложување Bet365, играта League of Legends, компанијата за сметководство и исплата на плати Sage, како и YouTube и Google, според Downdetector, сајт кој ги мери извештаите за прекини.
И во Македонија голем број веб-портали, компании, онлајн продавници и организации кои користат Cloudflare за да ги заштитат и забрзаат своите веб-страници, беа офлајн неколку часа.
Што тргна наопаку?
Cloudflare го нарече „интерна деградација на услугата“. Поминаа нешто помалку од три часа од моментот кога компанијата објави дека го истражува проблемот до објавувањето дека е имплементирано решение и инцидентот е решен во 14:42 часот по британско време. Можеби имало посебен проблем со услугите во Лондон, бидејќи Cloudflare изјави дека морал да ја исклучи својата услуга за енкрипција во британскиот главен град за време на напорите за санација. Компанијата, исто така, соопшти дека имало необичен скок во сообраќајот кон една од нејзините услуги околу 11:20 часот наутро, но дека причината сè уште не е позната.
Што ни кажува овој прекин за здравјето на интернетот?
Бидејќи голем дел од светската економија се потпира на интернет – од банкарство до е-трговија – некои експерти за сајбер отпорност предупредуваат дека инфраструктурата станала премногу зависна од неколку големи компании, создавајќи „синџир на зависност“. Проблемите во Cloudflare доаѓаат помалку од еден месец по прекините кај други даватели на услуги во облак, AWS на Amazon и Azure на Microsoft. Заедно со Google Cloud, овие три даватели сочинуваат околу две третини од инфраструктурата што го поддржува дигиталниот свет. Експертите веруваат дека ова покажува дека разновидноста во понудата на интернет услуги треба да се зголеми.
