Труењето со кофеин настанува кога организмот ќе апсорбира опасно високи количества кофеин, состојба што може да предизвика сериозни здравствени последици, а во исклучително ретки случаи и смрт. Иако кафето е дел од секојдневието на милиони луѓе, лекарите предупредуваат дека постојат граници кои не треба да се надминуваат.
Според Националната асоцијација за кафе на Америка, просечниот Американец дневно пие нешто повеќе од три шолји кафе, навика што ја потврдува важноста на овој пијалок во утринската рутина на мнозинството. Но, стручњаците нагласуваат дека индивидуалната толеранција на кофеинот е различна, а внесот мора да биде во рамки на препорачаното.
Првите предупредувачки знаци на прекумерна консумација на кофеин се нервоза и забрзана работа на срцето. Во случаи кога доаѓа до предозирање, симптомите стануваат далеку посериозни, вклучувајќи проблеми со дишењето и напади.
Американската Управа за храна и лекови (FDA) препорачува максимум 400 милиграми кофеин дневно за здрави возрасни лица, што приближно одговара на четири до пет шолји кафе. Иако оваа количина сама по себе ретко е опасна, нутриционистката Ерин Палински-Вејд предупредува дека повисоки дози можат да предизвикаат анксиозност, раздразливост и други непријатни ефекти. Сепак, вистински токсичните реакции започнуваат кога ќе се внесат околу 1200 милиграми кофеин, еквивалент на најмалку 12 шолји кафе.
Кога настанува труење со кофеин, телото може да претрпи сериозни нарушувања. Според Нима Милези, директор за медицинска токсикологија во Универзитетската болница „Стејтен Ајленд“, стимулативниот ефект на кофеинот го нарушува нормалниот срцев ритам, што може да доведе до неправилно чукање на срцето, па дури и срцев удар. Дополнително, Палински-Вејд посочува дека кај овие пациенти чести се и гастроинтестинални проблеми како повраќање и дијареа.
Поради тоа што кофеинот го зголемува мокрењето, во случај на прекумерна консумација може да дојде до губење на важни минерали, особено калиум. Ниско ниво на калиум (хипокалемија) може да предизвика оштетување на мускулите, парализа, отежнато дишење и проблеми со функционирањето на бубрезите.
Забележани се и невролошки последици, од анксиозност и халуцинации, до мигрена, едем на мозокот и епилептични напади. Иако смртните случаи се исклучително ретки, стручњаците предупредуваат дека труењето со кофеин може да биде животозагрозувачко доколку не се реагира навреме.
