Светското производство на вино малку се зголеми во 2025 година, но остана под просекот трета година по ред, бидејќи лозјата беа изложени на екстремни и променливи временски услови, соопшти Меѓународната организација за лозарство и вино (OIV).
Во своите први прогнози, организацијата го процени глобалното производство на вино на 232 милиони хектолитри оваа година, што е за 3 проценти повеќе отколку во 2024-та година, но 7 проценти под просечното ниво од последните пет години.
„Ако ги погледнеме причините за помалото производство во последните три години, главниот дел од нив се климатските промени што ги гледаме на двете хемисфери“, изјави Џон Баркер, генерален директор на „OIV“.
„Некои области доживеале топлина и суша, а потоа поројни дождови или неочекувани студени бранови. И фактот дека ова е трета година по ред што ги гледаме овие ефекти е впечатлив“, додаде тој.
Во Европа, Франција ја пријавува својата најслаба жетва од 1957-ма година, производството во Шпанија падна на 30-годишно најниско ниво, а Италија ја враќа својата позиција како најголем светски производител со зголемување на производството од 8%, потпомогнато од поволните временски услови.
Се очекува Соединетите Американски Држави, четвртиот најголем светски производител на вино, да произведе 21,7 милиони хектолитри вино, што е зголемување од 3% во однос на 2024-та година, иако е далеку под историските максимуми и 9% под петгодишниот просек.
Производството на јужната хемисфера се зголеми за 7% по три последователни години пад, предводено од Јужна Африка, Австралија, Нов Зеланд и Бразил, што го компензираше падот во Чиле. Но, производството остана 5% под просекот, соопшти „OIV“.
„Се очекуваше ограничениот раст на глобалното производство на вино да помогне во стабилизирањето на залихите во услови на слаба побарувачка на зрелите пазари, пад на потрошувачката во Кина и континуирана неизвесност во глобалната трговија“, рече Баркер.
„Ниското производство може да биде многу тешко за поединечните производители и региони… но од макроекономска перспектива, тоа е позитивно бидејќи навистина гарантира дека производството и потрошувачката се повеќе или помалку во согласност“, додаде тој.
„OIV“ треба да ги ажурира своите прогнози подоцна оваа година. Еден хектолитар е еднаков на 133 стандардни шишиња вино.
