Руската нафтена компанија Лукоил денес објави дека ги прекинува работите на својот најголем проект во Ирак, нафтеното поле Вест Курна-2, откако американските и британските санкции ги блокираа неговите операции и финансиски текови.
Ирачките власти потврдија дека сите плаќања кон Лукоил, во готово и сурова нафта, се прекинати откако беа воведени санкциите.
Поради неможноста за примање плаќања, компанијата го информираше ирачкото Министерство за нафта дека не може да продолжи со редовно работење, известува агенцијата.
Доколку ситуацијата не се реши во следните шест месеци, Лукоил целосно ќе го запре производството и ќе се повлече од проектот, според висок ирачки функционер.
Нафтеното поле Вест Курна-2 моментално произведува околу 480.000 барели нафта дневно, што е приближно девет проценти од вкупното производство на Ирак и е највредниот странски проект на Лукоил.
Санкциите, исто така, доведоа до откажување на испораките на три танкери со нафта наменета за компензација на Лукоил.
Ирачката државна компанија СОМО нема да може да ја продолжи соработката додека не се најде начин за плаќања што не ги кршат мерките на САД, соопштија извори во секторот.
Лукоил ја активираше клаузулата за таканаречената виша сила за да се заштити од можни казни поради неисполнети договорни обврски. Во исто време, компанијата го откажа ангажирањето на сите странски работници кои не се руски државјани, додава британската агенција.
