„Toyota“ најави нови батерии за електрични возила, а се чини дека тие ќе бидат поткрепени со сериозна технологија.
Во неодамнешно интервју, лидерот на компанијата Акио Тојода отворено зборуваше за своите сомнежи и причините зошто не го поддржал од срце ненадејниот премин на автомобилската индустрија кон електрична енергија.
Иако нивниот пристап кон електричните автомобили досега беше претпазлив, се чини дека „Toyota“ тивко, зад сцената, ја усовршува својата сопствена технологија за електрични возила веќе долго време.
Според најновите информации, „Toyota“ развива „цврста батерија“ што би можела да трае до 40 години, што е четири пати повеќе од просечниот животен век на денешните батерии за електрични возила. Во суштина, ова се батерии што користат „цврсти електролити“.
Уште поимпресивно е што компанијата планира да ја воведе оваа технологија во масовно производство веќе во 2027-ма или 2028-ма година.
Технологијата на овие батерии изгледа исклучително добро на хартија: ветува опсег од најмалку 1.000 километри, а батериите треба да бидат помали, полесни и поевтини од денешните литиум-јонски.
