Европската комисија планира да воведе нова категорија на мали и прифатливи електрични возила во декември, за да им овозможи на производителите да произведуваат и продаваат модели во ценовен опсег од 15.000 до 20.000 евра.
Како што потврди европскиот комесар за индустрија, Стефан Сежурне, целта е да се забрза развојот и да се зголеми производството на мали електрични автомобили во Европа, особено поради зголемената конкуренција од Кина.
Новата регулатива би можела да им овозможи на помалите автомобили да бидат ослободени од дел од задолжителната безбедносна опрема, што дополнително би ги намалило трошоците. Ова би отворило простор за поприфатливи модели, како што се новиот електричен „Renault Twingo“ и малото електрично возило на „Volkswagen“.
Европската комисија ја разгледува и иднината на моторот со внатрешно согорување – од 2035-та година, би можела да се дозволи продажба на нови возила што работат на синтетички горива и „plug-in“ хибриди.
Оваа одлука би можела целосно да го промени европскиот пазар и да овозможи враќање на мали, достапни автомобили, кои некогаш беа симболи на европските патишта.
