„Mercedes“ вдахнува нов живот во она што некогаш беше најпрепознатливиот елемент на своите возила. Брендот ја објави првата некамуфлирана фотографија од својот нов компактен електричен „SUV“ – „GLC“, откривајќи ретро-футуристичка осветлена решетка.
Иако на електричните возила не им е потребно толку многу проток на воздух како автомобилите со мотори со внатрешно согорување, наследникот на „EQC“ ќе ја има највпечатливата решетка од кој било модел на „Mercedes“ кога ќе биде претставен следниот месец на Саемот за автомобили во Минхен (IAA).
Широката решетка ги игнорира актуелните трендови во дизајнот и гордо го истакнува хромот.
Препознатлива форма, но целосно редефинирана
Купувачите на новиот „GLC“ ќе мора да платат дополнително за решетката за да го постигнат својот целосен ефект.
Дополнителен пакет за осветлување вклучува дури 942 светлосни точки, кои се анимираат кога возачот се приближува до автомобилот, а свети и познатата трокрака ѕвезда.
„Mercedes“ се соочи со критики за дизајнот на моделите „EQE“ и „EQS“, кои беа наречени „досадни“, па затоа новата решетка треба да го направи „GLC“ многу повпечатлив.
Но, се чини дека „GLC“ нема да биде единствениот модел со овој преден дел.
Нова ера на дизајн за целиот бренд
Според раководителот на дизајнот Гордон Вагенер, новата решетка претставува повеќе од само естетско освежување.
„Нашата нова иконска решетка не е само ново лице за ‘GLC’, таа го редефинира лицето на нашиот бренд“, рече Вагенер.
„Тоа е совршена комбинација од долгогодишни дизајнерски кодови реинтерпретирани за иднината, кои ги прават нашите возила веднаш препознатливи“, додава Вагенер.
Промената е дел од поширока стратегија. Според „Autocar“, извршниот директор на „Mercedes“, Ола Келениус, рече дека редизајнираната решетка треба да му помогне на брендот да се истакне „во време кога има повеќе од 100 кинески производители“.
