„Тесла“ одобри нов пакет акции за извршниот директор Илон Маск, вреден речиси 30 милијарди долари, во обид да ја зголеми неговата компензација и да го задржи на чело на компанијата.
Компанијата објави дека одобрила доделување на 96 милиони ограничени акции на Маск според Планот за стимулации за акции од 2019 година.
Со моменталната цена на акциите на „Тесла“ од 302 долари, овој пакет вреди околу 29 милијарди долари. За да ги стекне тие акции, Маск би требало да плати само 23,34 долари по акција, што значи дека би платил вкупно околу 2 милијарди долари.
Илон Маск неодамна предупреди дека неговата компанија веројатно ќе се соочи со неколку „тешки квартали“, а акциите на Тесла паднаа за повеќе од шест проценти по слабите резултати во вториот квартал од 2025 година.
Покрај тоа, приходите од продажба на автомобили во вториот квартал од 2025 година се намалија за 16 проценти во однос на истиот период минатата година на 16,7 милијарди долари, слабите испораки на возила и пониските просечни продажни цени дополнително ја влошија целокупната слика, а трошоците за увозни давачки се зголемија за 300 милиони долари.
Фирмата предупреди дека новото законодавство – кое го завршува американскиот федерален даночен кредит од 7.500 долари за електрични возила на крајот на септември – дополнително ќе ги загрози испораките.
Тесла се обидува да го насочи вниманието на инвеститорите кон развојот на роботакси и хуманоидниот робот Оптимус.
Во јуни, пилот-проектот на услугата роботакси започна во Остин, Тексас, но во моментов е достапен само за ограничен број корисници со безбедносен возач во возилото.
