САД ја предупредија Кина за можноста за секундарни санкции против нејзините компании што купуваат руска нафта, изјави министерот за финансии Скот Бесант, цитиран од „Reuters“.
„Кина е многу заинтересирана за својот суверенитет. Ние не сакаме да се мешаме во нивниот суверенитет – ако сакаат да плаќаат 100% царини… нека платат“, рече Бесант.
Тој истакна дека предлогот на сенаторите Линдзи Греам (Републиканска партија) и Ричард Блументал (Демократска партија) има широка поддршка во Конгресот.
Законот предвидува воведување санкции во форма на царини од 0 до 500% за увоз на стоки од земји што купуваат руски енергетски ресурси. Целта е да се намалат приходите во рускиот буџет, кој главно се потпира на продажба на нафта и природен гас.
Според Бесант, претседателот Доналд Трамп ќе избере 100% царина, а повеќето западни партнери што ја поддржуваат Украина ќе се приклучат на мерките.
Главни купувачи на руска нафта се Кина, Индија и Турција. Според аналитичарите, Индија е склона да се откаже од руската нафта бидејќи преговара за трговски договор со Соединетите Американски Држави.
„Reuters“, исто така, објави дека Казахстан и Турција водат разговори за зголемување на количината на нафта што се транзитира преку нафтоводот Баку-Тбилиси-Џејхан.
Од почетокот на војната во Украина, Казахстан се обидува да се дистанцира од Русија. Во летото 2022-ра година, земјата регистрираше свој вид нафта (дотогаш се продаваше како „Урал“ бидејќи нивните карактеристики се слични) и избегнува транзит на нафта низ Русија.
Аналитичарите се сомневаат дека Трамп ќе воведе 100% царина за Кина, дури и ако земјата продолжи да купува руски енергетски суровини. Сепак, пазарите почнуваат помирно да гледаат на таа перспектива.
